Преименитаго великого государства, матере градовом Росийскаго царства православным християном, всяких чинов людем, которые еще душь своих от бога не отщетили, и от православные веры не отступили, и верою прелести не последуют и держатся благочестия, и к соперником своим не прилепилися, и во отпадшую их не уклонилися, и паки хотят за православную свою веру стояти до крове. Бога ради, государи, моляще его, всемилостиваго бога, и пречистую его матерь, заступницу нашу и молебницу и помощницу всему роду нашему християньскому, и великих чюдотворцов, иже у нас в Троице преименитых, и всех святых, - не нерадите о себе! Вооружимся на общих сопостат наших и врагов и постоим вкупе крепостне за православную веру, и за святыя божия церкви, и за свои души, и за свое отечество, и за достояние, еже нам господь дал! И изберем славную смерть; аще и будет нам то, и по смерти обрящем царство небесное и вечное, нежели зде безчестное и позорное и горкое житие под руками враг своих.
      Поревнуем и подивимся великому оному нашему граду Смоленьску, его же стояние к западу, како же в нем наша же братия православныя християне сидят и великую всякую скорбь и тесноту терпят, и стоят крепце за православную веру и за святыя божия церкви, и за свои души, и за всех за нас, а общему нашему сопостату и врагу, королю, не покорятся и не здадутся. Сами ведаете, с коего времяни сидят и всякое великое утеснение терпят. И ни на которую меру не поползнутся и никакову их вражию прелесть и на обещание не прольстятся, что им обещевает и сам нашь сопостат. И вси стоят единодушьно и непреклонно и неподвижно умом и душою на их прелестное ложное обещание, и душь своих не потопят и во веки ими погибнути не хотят, а хотят славно умрети, нежели безчестне и горко жити. И каково мужество показали и какову славу и похвалу учинили во все наше Росийское государьство! Да не токмо в нашу во всю пресловущуго землю, но и в иншия орды, в Литовскую и Польскую, и во иные многие: чаять, и до Рима, или будет и дале, паки же ту славу и хвалу пустили, яко же и у нас. Да и самого того короля, лютаго врага, сопостата нашего, и его способников, таких же безбожников, яко же он, которыя с ним тамо подо оным градом стоят и град тый, аки злыя волки похитити хотят и которые у нас зде в великом нашем граде живут и на сердцах наших стоят и, аки лютыя лвы, всегда поглатити нас хотят... Чаем, яко и малым детем слышавше, дивитися той их граждан храбрости и крепости и великодушию, и непреклонному уму. Аще будет их до конца бог тако укрепит, яко же ныне, и учиняют таковое свое крепкое стояние и великое скорбное терпение за православную веру, за святыя божия церкви и за себя и за всех за нас, и усидят. И тою своею крепостию все царство удержат от того лютаго нашего сопостата, по коих мест сам господь весть и неизреченными своими судбами невидимо великую свою милость подаст всему нашему великому государьству и избавит нас всех от толиких неудобносимых бед и измет нас из рук тех врагов наших, аки агнецов из уст волчиих. Тогда кто готов будет изрещи ту их доблесть и крепость?..
      Подобает же нам ревновати и дивитися и посланным нашим от всея нашея великия Росия, - вначале от подражателя и сопрестолника святых святейших вселеньских патриярх, от первенца и главы церковныя всея Русии, пастыря нашего и учителя и отцем отца и святителя, неложнаго стоятеля и крепкаго побарателя по вере християнстей; потом от благородных и великих самех земледержцов наших и правителей, ныне же близ рещи и кривителей, и не о том днесь слово, иже впредь узрите; таже и от всех людей всяких чинов, - под оный град Смоленеск к тому сопостату нашему и врагу королю на добрейшее дело, на мирное совещание и лутшее уложение...
      Злонравный же злый он сопостат король никако же ничего того не хотя и не мысля в уме своем тако тому быти, якоже нам годе: понеже от давных лет мыслят на наше великое государство все они окаянники и безбожники, иже и преже того были его же братия в той же их проклятой земле и вере, како бы им великое государьство наше похитити и вера християнская искоренити и своя богомерзкая учинити; но не у бе им было время, дондеже прииде до того нынешняго нашего сопостата, врага короля. Но зело зель возрадовася во злокозненом сердцы своем и воскипе всеми уды своими, яко бы некто, не изгубя, велико богатество хощет обрести, и велми рад бысть в сердцы своем, и некоя ради вины еще не до конца его видит в руках своих; тако же и он, окаянный король: ни ему искони дано от бога, и паки ни его достояние, ни отечество, а хощет сие великое наше государство и в нем бесчисленное богатество взяти и владети, и радуется и кипит злым своим сердцем, чаяти, яко и на месте мало сидит, или такоже мало и спит от великия тоя своея радости; и непокорением и удержанием того крепкаго нашего града еще до конца все наше Росийское великое государьство у себя в руках видит... И паки надеяся на то окаянный, что божьим изволением царский корень у нас изведеся, - вместо тленнаго и мимотекущаго царство небесное и вечно восприяше, - и земли нашей без них, государей, овдовевши и за великия грехи наша в великия скорби достигши, и горши всего, разделение в ней на ся учинися, и гордости ради и ненависти не восхотеша многи от християньска рода царя изобрати и ему служити, но изволиша от иноверных и от безбожных царя изыскати и ему служити. И те прежереченныя его доброхоты, а наши злодеи, о именех же их несть зде слова, растлилися умы своими и восхотеша прелести мира сего работати и в велицей славе быти, и инии, не сыи человецы, не по своему достоиньству саны честны достигнути, и сего ради от бога отпали и от православныя веры отстали, и к нему, сопостату нашему королю, вседушно пристали, и окаянными своими душами пали и пропали, и хотят ево, злодея нашево, на наше великое государство посадити и ему служити. И по се время мало не до конца Росийское царство ему, врагу, предали. Аще бы им мощно, то единем бы часом привлекли его, врага, сюде и во всем бы с ними над нами волю свою сотворили; но всемилостивый владыко еще на нас, грешных, своею милостию призирает, и мысль их и совет разает, и тем крепким нашим градом, иже он, злодей, под ним стоит, его утвержевает и к нам итти воспрещает. Аще за великия грехи наша, его же божиим прогневанием, и его, злодея нашего, злым умышлением, которою мерою возмет тот наш крепкостоятелный град, тогда и царствующаго града доидет и всех достигнет и нас себе покорит. И паки те ево доброхоты, а наши злодеи, вси об нем радят и во всем ему добра хотят, и великое Росийское царство до конца хотят ему отдати для своея мимотекущия славы и величе-ства; и того ради он, окаянный, не хощет так сотворити, яко же нам годе, и уже конечно во уме своем мыслит, что великое наше государство обовладел. А бесовскаго своего воиньства всю нашу землю наполнил, и конечно надежен стал быти, и тех посланных наших держит и всякою нужею, гладом и жадою конечно морит и пленом претит...
      Паче же подивимся и удивимся пастырю нашему и учителю и великому отцем отцу и святителю! Имя же его всем ведомо, - како, яко столп, непоколебимо стоит посреди нашея великия земли, сиречь посреди нашего великаго государства, и по православной вере побарает, и всех тех душепагубных наших волков и губителей увещевает, и стоит един противу всех их, аки исполин муж, безо оружия и безо ополчения воинскаго, токмо, учение, яко налицу, в руку свою держа противу великих агарянских полков и побивая всех. Тако же и он, государь, вместо оружия токмо словом божиим всем соперником нашим загражая уста и посрамляя лица и безделны отсылая от себя, и нас всех укрепляет и поучает, чтоб страха их и прещения не боятися, и душами своими от бога не отщетитися, и стояти бы крепце и единодушно за преданную нам от Христа веру и за свои души, яко же оне, граждане, во оном граде и послании наши под тем же градом.
      О великое божие милосердие! Еще не до конца прогневася на христьяньский род! О чюдо и дивство и воистину великим слезам достойно, како мати градовом в Росийском государстве всеми стенами и многими главами и душами врагом и губителем покорилася и предалася и в волю их далася, кроме того нашего великого крепкаго и непоколебимаго столпа, разумнаго и твердаго адаманта, и с ним еще многих православных християн, которые хотят стояти за православную веру и умерети!..
      Скажу вам истинну, а не лжу, что однолично сопостаты наши, которыя у нас ныне с нашими изменники - единоверники, и с новыми богоотступники, и кровопролители, и разорители веры християнския, с первенцы сатанины, с июдиными предателя Христова братиею, с началники, и со иными их подручники, и угодники, и единомысленники, иже недостойны по своим злым делом прямым своим званием именоватися (рещи достоит их - душапагубныя волки), хотят нас конечно погубити и под меч подклонити, и подружия наша и отроды в работу и в холопи поработити, и прижитие наше пограбити, горше же всего и жалостнее, - святую нашу непорочную веру в конец искоренити и свою отпадшую учинити, и сами в нашем достоянии жити. Сами видите, что они ныне над нами чинят: всегда в очех наших всем нам смерть показуют, и поругаются и насилуют нам, и посекают нас, и домы наши у нас отнимают, и поносят нам в лепоту, яко волцы зубы своими скрегчют, и грозят нам и претят смертию. Да не токмо нам ругаются и смеются, но самому создателеву образу и рождьшей его, и руками дерзают и в вид существа божия и пречистыя его матере стреляют, яко же ныне свидетельствуют злодейственнеи руце, приговожденнеи к стене под образом матери божии и всем им, окаянным в страх и в трепет... А ныне послали во все городы, по которым стоят такие же губители и кровопролители неповинных новоизраительских кровей, а велели им быти сюда к нам, а наших людей же в Еюиньском чину, которыя живут у нас зде, тех всех ссылают долов; а умышляючи то, чтобы их врагов было много, а нас было мало, чтобы нам отнюд противу их стати не мочно, и в конец бы им нами обовладети и себе покорити. На то не смотрите, православнии християне, и не имите тому веры, что они ныне пред вами лицемерство чинят, сами своих людей казнят, - а все нам блазнят, уверяючи и прелщаючи нас тем, тако вторят и сказывают, что не отцу быти у нас, но сыну. А и сам тот злодеец нашь, сыновень отец, тоже льстит и блазнит, аки сатана, мечты творит, и аки бесов с вестьми присылает, что хощет сына своего нам дати, по здешним его, злодея, злодеев наших, а его доброхотов, по прежереченных онех изменников всему нашему великому государству, крестопреступников и веры отступников, и умышлению и добрахотению ему, злодею...
      Великий же он столп и твердый адамант и крепкий воин Христов, не имея ни тула, ни меча, ни шлема, ни копия, ни воин вооруженных, - понеже ему не дано то, ни повелено от сотворшаго вся того держати, - и к тому же ни стен крепко огражденных, и словом божиим, аки некиим изрядным оружием, препоясався, или яко изящными воины ополчився или некими крепкими, стенами оградився: не бойтеся, - рече, - от убивающих тела, души же коснутися не могут...
      Вестно и дерзостно достоит рещи: аще бо таких великих и крепких и непоколебимых столпов было у нас не мало, никакоже бы в нынешнее злое время от таких душепагубных волков, от видимых врагов, от чужих и от своих, святая и непорочная вера наша не пала, наипаче бы просияла, и великое бы наше море без поколебания и без волнения стояло. А ныне един уединен стоит и всех держит и врагом сурово прет, а иному некому пособити ни в слове, ни в деле; кроме бога и пречистыя его матери и великих чюдотворцов, способников себе не имеет никаго же. Которые были его сынове и богомолцы, той же сан на себе имеют, и те славою мира сего прелестнаго прелстилися, просто рещи, подавилися, и к тем врагом приклонилися и творят их волю. А сами наши земледержьцы, яко же и преже рех, - землесъедцы, те и давно от него отстали, и ум свой на последнее безумие отдали, и к ним же ко врагом пристали, и ко иным, к подножию своему припали, и государьское свое прирожеиие пременили в худое рабское служение, и покорилися и поклоняются неведомо кому, - сами ведаете. И смотрят из рук и из скверных уст его, что им даст и укажет, яко нищии у богатого проклятаго, иже впреди и мы вам про проклятое имя его от бога и от человек вмале объявим. Зде же еще впреди поидем. И тако те наши благороднии зглупали и душами своими пали и пропали навеки, аще от того зла и худа на добро не обратятся. Горши же нам всего учинили, что всех выдали, да не токмо выдали, ино заедино с ними, со враги, вооружилися вкупе и хотят нас все погубити и веру християньскую искоренити. Аще будет и есть избраннии, сердцем желании по християньстей вере и по всех по нас жалеют и радят, от тех же чинов и болярских родов, но не могут ничево учинити и не смеют стати, что не с кем поборати, и своего величества отбыти а им, врагом, ничего не сотворити, понеже сильно обовладели и многих маловременным богатеством и славою прелстили, и иных закормили, и везде свои слухи и доброхоты поистоновили и поизнасадили. Ина толка у нас ныне по бозе и по пречистей его матери стены и забрала, что он, государь, великий святитель и крепкий заступитель...
      А вы, православнии, не помогаете ему, государю, ни в чем: говорите усты, а в делех ваших, государь весть, что у вас будет. Паки молю вы с великими слезами и сокрушенным сердцем: не нерадите о себе и о всех нас! мужайтеся и вооружайтеся и совет между собою чините, како бы нам от тех врагов своих избыти! Время, время пришло, вовремя дело подвиг показати ина страсть дерзновение учинити, как вас бог наставит и помощь вам подаст! Прибегнем к богу и пречистей его матери и к великим чюдотворцем и ко всем святым, припадем к ним с теплою верою и со умилным сердцем и с горящими слезами: некли нам милость свою подадут. И препояшемся оружием телесным же и духовным, сиречь молитвою и постом и всякими добрыми делы, и станем храборски за православную веру и за все великое государство, за православное християньство, и не подадим того пастыря нашего и учителя и крепкаго побарателя по вере прапославной, и того нашего преславнаго града, иже за всех за нас тако же стоит и сопостата нашего держит...
      Что стали? что оплошали? чего ожидаете и врагов своих на себя попущаете и злому корению и зелию даете в землю вкоренятися и паки, аки злому горкому пелыню, распложатися?..
      Сами вси видите, какое гонение на православную веру и какое утесенение всем православным християном от тех губителейнаших и врагов: всегда многим смертное посечение, а иным зелное ранение, а иным грабление, и женам безчестие и насилование. И купльствуют не по цене, отнимают силно, и паки не ценою ценят, но с мечем над главою стоят над всяким православным християнином, куплю деющаго, и смертию претят. Наш же брат, православный християнин, видя свое осиротение и беззаступле-ние и их, врагов, великое одоление, не смеет ин и уст своих отверсти, бояся смерти, туне живота своего сступается и только слезами обливается...
      То ли вам не весть,то ли вам не повеление, то ли вам не на -казание, то ли вам не писание? Ох, ох! Увы! увы! горе, горе! люте, люте! и где идем? и камо бежим? Како не восплачемся, како не возрыдаем, како от сердца не воздыхаем, како в перси не бием? како сами себя презираем и не радим о себе, видя за великия и безчисленныя грехи наши от создателя и зижителя всех конечное на нас смирение, и их, тех врагов чюжих и своих, попущение и всякое от них на себя ругание и смеяние? А еще и плачем, аще и рыдаем, аще и в перси бием, аще и от сердца воздыхаем и зелно ему досаждаем, а подвигу и радения не сотворяем, и к богу не прибегаем и его не умоляем, и над ними, враги, ничего не промышляем, и все в презорство пущаем и сами в свою веру и землю злое семя вкореняем.
      Паки реку: ох, за безчисленныя грехи наша чим нас господь не смиряет, и каких казней не посылает, и кому нами владети не повелевает! Сами видите, кто той есть, неси человек и неведомо кто: ни от царских родов, ни от болярских чинов, ни от иных избранных ратных голов; сказывают, - от смердовских рабов. Его же, окаяннаго и треклятаго, по его злому делу, не достоит его во имя Стратилата но во имя Пилата назвати, или во имя преподобнаго, или во имя страстотерьпца, но во имя землеедца, или во имя святителя, но во имя мучителя и гонителя и разорителя и губителя веры християнския; и по словущему реклу его такоже не достоит его по имяни святого назвати, но по нужнаго прохода людскаго - Афедронов. Таким именитым государством владеет, аки великим морем колеблет: что хощет, то творит, а никто ему не возбранит. А сами наши земледержцы и правители, нынеже, - то же и преже рех, - землесъедцы и кривители, те яко ослепоша или онемотеша, паче же рещи, не смеют ни един тому врагу воспретити и великому государству ни в чем пособити; а инии молчат и не говорят и ни в чем ему не претят, понеже с ним же, со врагом всех нас погубити хотят. И полцы велицы, всяких чинов люди за тем врагом ходят и милости и указу от него смотрят: не токмо простии и неимянитии люди, но и сами болярские и дворянския дети, и сами дворяне добродни и изрядни всем, иже иному он, враг креста Христова и всех православных християн, и в подножие ног негожь...
      И царьство наше от них не отстоится, погибнет, - кто не восплачется, кто не возрадуется, кто не воздохнет? не токмо кто от нашия православныя веры и християньска рода православный християнин, - мню, от иноверных или от тех же врагов, мало-мало кто мягок и жалостив сердцем, ино и тот аще не заплачет и он воздохнет и речет: како таковая великая и преславная земля во всех землях стала в разорении, и таксе великое царство в запустении, и таковая великая царьская ризница в расточении! - И вы, православнии, богом почтении, умилитеся душею, содрогните сердцем, зряще на себе такия неудобносимыя беды и скорби, и смерть свою всегда видяще во очех своих и попрание веры нашея православныя, и не давайте сами себя в руки врагом своим! Взяв бога на помощь и пречистую его матерь и великих чюдотворцов и всех святых, дерзайте на враговъ своих...
      А сему бы есте писму верили без всякого сумнения, яз вам сказываю и пишу. И аз их думы и мысли слышечи, помнячи свою православную веру, и не хощу души своей грешной до конца погубити и в геене ею быти. Грехом своим великим и слабостыо, и славою мира сего прельстился тако же, яко и прочая братия наша, для ради суетныя сея славы и тленнаго богатества. Все мы, того ищучи, в том и погибли: аще бы того не искали, все бы от бога не отпали и не пропали. И ныне аз сусмотрих, что последуючи им, врагом креста Христова и всех нас православных християн губителем, и будучи в их во отпадшей отъ бога вере и не отстав от них, быти в геене огненней душею и телом. Явно мне не мощно от них остати и вам про се сказати, или бы единому кому от вас втайне рещи: боюся, некли тот человек умом своим поползнется и не утерпит и вам скажет имя мое; и от вас разнесется и до них, врагов и губителей християнских донесется; тогда мя, взяв, злой смерти предадут; аз же у них ныне зело пожалован. Сами ведаете, что все мы смерти боимся; а се такоже имею жену и дети, яко же и вы: аще мне самому случится умрети, вестно и на господа надежда, что не умрети, но ожити за ту правду, ино жена и дети осиротити, меж двор пустити или, будет всего того горши, - на позор дати. А вам будет, православнии, в те поры ничего не учинити, понеже ныне врагов воля и сила стала. Для ради того явно вам сам не дръзну сказати, от них отстати: сего ради писмом вам потрудихся написати. Аще господь помилует всех нас и избавит нас от тех наших видимых врагов, и живи будем, - все тогда явно вам будет, и про нас, про грешных. Аще будет вам и молвити, что и яз вам ныне враг и наветник, ино господь зрит тайная моя, что с вами же хощу душу свою положити за православную веру и за святыя божия церкви. А ныне, яко же и выше рех, нужда ради не отстану от них.
      И кто сие писмо возмет и прочтет, и он бы его не таил, давал бы, разсмотряючи и ведаючи, своей братие, православным християном, прочитати вкратце, которыя за православную веру умрети хотят, чтобы им было ведомо, а не тайно, - и не тем, которыя были наша же братия, православныя християне, а ныне всею душею без раскаяния отвратилися от християнства и во враги нам претворилися, и с ними, со враги, соединилися, и вкупе с ними вооружилися, и хотят нас до конца погубити, - тем бы есте отнюд не сказывали и не давали прочитати. Буди же вам всем доброхотящим Росийскому царству милость божия и помощь и пречистыя богородицы и великих чюдотворцов, иже у нас в Троице преимянитых и всех святых. Аминь.

назад		далее