СЛОВО В НОВУЮ НЕДЕЛЮ ПО ПАСЦЕ

      ...Ныне солнце красуяся к высоте въсходить и радуяся землю огреваеть, взиде бо нам от гроба праведное солнце Христос и вся верующая ему съпасаеть. Ныня луна, с вышняго съступивши степени, болшему светилу честь подаваеть: уже бо ветъхый закон по писанию, с суботами преста и пророки, Христову закону с неделею честь подаеть. Ныня зима греховная покаяниемь престала есть и лед неверия богоразумиемь растаяся; зима убо язычьскаго кумирослужения апостольскимь учениемь и Христовое верою престала есть, лед же еомина неверия показаниемь Христов ребр растаяся. Днесь весна красуеться, оживляющи земное естьство: бурнии ветри, тихо повевающе, плоды гобьзують и земля, семена питающи, зеленую траву ражаеть. Весна убо красная есть вера Христова, яже крещением поражаеть человеческое паки естьство, бурнии же ветри - грехотворнии помыслы, иже покаянием претворьшеся на добродетель, душеполезныя плоды гобьзують: земля же естьства нашего, акы семя слово божие приимши и страхомь его болящи, присно дух спасения ражаеть. Ныня новоражаеми агньци и уньци, быстро путь перуще, скачють и, скоро к матерем възвращающиеся, веселяться, да и пастыри свиряюще веселием Христа хвалять. Агньца глаголю - кроткия от язык люди, а уньца - кумирослужителя неверных стран иже Христовым въчеловечениемь и апостольскимь учениемь и чюдесы, скоро по закон емьшеся, к святей церкви възвратившеся, млеко си учения сьсуть, да и учители Христова стада о всех молящеся, Христа бога славять, вся волкы и агньца в едино стадо събравшаго. Ныня древа леторасли испущають, и цветы благоухания процвитають, и се уже огради сладъку подавають воню; и делатели с надежею тружающеся плододавца Христа призывають. Бехом бо преже аки древа дубравная, не имуще плода, ныняже присадися Христова вера в нашемь неверьи, и уже держащеся корене Иосеева, яко цветы добродетели пущающе, райскаго паки жития о Христе ожидають, да и святители о церкви труждающеся от Христа мьзды ожидають. Ныня ратаи слова, словесныя уньца к духовному ярму приводяще, и крестное рало в мысьленых браздах погружающе, и бразду покаяния прочертающе, семя духовное всыпающе, надежами будущих благ веселяться. Днесь ветхая конець прияша, и се быша вся нова, въскресения ради. Ныня рекы апостолскыя наводняються, и язычныя рыбы плод пущають, и рыбари, глубину божыя въчеловечения испытавше, полну церковную мрежю ловитвы обретають: реками бо, рече пророк, расядеться земля, узрять и разболяться нечестивии людье. Ныне мнишьскаго образа трудолюбивая бчела, свою мудрость показающи, вся удивляеть; якоже бо они, в пустынях самокормиемь живуще, ангелы и человекы удивляють, и си, на цветы възлетающи, медвены сты стваряють, да человеком сладость и церкви потребная подасть. Ныня вся доброгласныя птица церковных ликов гнездящеся веселяться: и пьица бо, рече пророк, обрете гнездо себе, олтаря твоя, и свою каяждо поющи песнь, славить бога гласы немолчьными...



   назад       далее